|
| |
Пост N: 390
Зарегистрирован: 29.08.05
Откуда: Русь, ОМСК
|
|
Отправлено: 05.02.08 17:44. Заголовок: Иван Вишенский. Обличение диявола-миродержца
И поят его диявол на гору высоку зѢло и показа ему вся царствия мира и славу их и глагола ему: Сия вся тебѢ дам, аще, пад, поклониши ми ся. Тогда глагола ему Исус: Иди за мною, сатана! Писано бо ест: Господу Богу твоему поклонитися и тому единому послужити Евангелие от Матфея, глава 4 Вопрос: Тут теды, коли ся звытязство над прелестию твоею, сыну геенский, от Христа избавителя стало и смертию конечно царство твое лукавое мира сего обважено и показано (через вѢру и крещение во имя отца и сына и святого духа) всему свѢту есть, пытаю тя, як будеш зас тое гнѢздо миролюбия в вѢрных и крещеных вити и основание невѢрия языческого фундовати. ОтповѢдь прелестника диявола-миродержца: Сталося звытязство от Христа над царством моим, признаваю, але от облеченых в имя его зовемых християн мало и велми мало, и то еще от свѢжей памяти по вознесений его на небеса чясть нѢкая, тою теплотою вѢры разждеженная, нѢгде-нѢгде от рода християнского на звытязство моего царства обралася. А нынѢшнего вѢку зась в клюбу нѢвѢрия первого зовемое християнство впало, и одным способом с поганци некрещеными мир любят и царство и роскоши его насытитися прагнут и еще болше, нежели погане, похоти телесные своволного и нечистого жития своим злым житием исполняют. А што пытаеш, якобы по ХристовѢ звытязствѢ миролюбием во християнстве вшрубоватися есми мѢл, а тое пытати не треба. Таковою ж хитростию, прелестию, мечтанием и усоложением блеску и красоты свѢта того, яко же и прежде пришествия Христова. Ибо Христос образ толко побѢждати хотящим мира дал, показал и научил и сам собою изобразил, прелести же моего лживого царства мнѢ не отнял и не погубил, ато для того учинил, абы самовластие человѢческое в том искусѢ, борбѢ и пробѢ вѢка того настоящого досвѢдчалося, очищалося и на живот вѢчный исполеровало. Але вижу, мало ся их обирает и знаходит на той тѢсный гостинец хотячих и любячих ходити; ти ж всѢ пали и поклонилися славѢ, царству, красотѢ и любви вѢка того настоящого, мною владомого. От началных и до послѢдних, от духовно зовемых и до простых, от властей и до подручных — всѢ полюбили тот мечт, блеск и пестроту красоты царства моего миреного, которую есми на горѢ Христови обнажил и показал. И всѢ нынѢшнего вѢка до того моего царства розум, мысль, любов сердечную и всю крѢпость телесную привязали, прилѢпили и приспоили сут так моцно, иж их только смерть, от Бога посланная, от любви моего царства розлучити может, а другое ничтоже. И зась тое ж мовлю и показую, што при ХристѢ мовилем и показовал: хто чого ищет у мене, миродержца, аще, пад, поклониши ми ся, вся тебѢ дам. Вопрос: Што ж ми даеш, дияволе? Именуй, да знаю наперед. ОтвѢт: Дам ти нынѢшнего вѢка славу, роскош и богатство. Если хочеш быти преложоным, духовно зовомом, от мене ищи и мнѢ угоди, а Бога занедбай; бо от того не леда як таковые достоинства дарованы бывают, а я скоро тобѢ дам. Если хочеш бискупом быти, пад, поклони ми ся, я тобѢ дам. Если хочеш арцибискупом быти, пад, поклони ми ся, я тобѢ дам. Если хочеш кардиналом быти, пад, поклони ми ся, я тобѢ дам. Если хочеш папѢжем быти, пад, поклони ми ся, я тобѢ дам. И другим всѢм, меншим преложенствам, пробощствам и поповствам в приходѢх и наданях, не так гойных и богатых, прагнучий, падши, поклонѢте ми ся, я вам дам. И до вас, мирской власти и титулу земного моего царства прагнучим, тое ж мовлю, аще, падши, поклоните ми ся, я вам вся сия прагненная вами подам. Если хочеш войским, подкоморим или судиею быти, пад, поклони ми ся, я тобѢ дам. Если хочеш каштеляном быти, пад, поклони ми ся, я тобѢ дам. Если хочеш старостою быти, пад, поклони ми ся, я тобѢ дам. Если хочеш воеводою быти, пад, поклони ми ся, я тобѢ, дам. Если хочеш гетманом или канцлѢром быти, пад, поклони ми ся, я тобѢ дам, буди досконалий угодник мой, я тобѢ дам. Если хочеш королем быти, обѢщайся мнѢ на офѢру в геену вѢчную, я тобѢ и королевство дам. И другим всѢм меншим дикгнитарствам и преложеньствам тое ж мовлю, аще, пад, поклоните ми ся и чого попрагнете от земных и дочасных, я вам дам. Тако ж и до вас, простых и неславных во моем царствѢ, мовлю: Аще, падши поклоните ми ся, знайду я по вашей мѢрѢ и простотѢ чим вас обогачу и в прелесть моего вѢка уплутаю. Если хочеш идолопоклонником, сребролюбцем и лихоимцем быти, я тебе мытником, купцем и корчмарем учиню; там твою волю и прагненя забавлятися, доколя здохнеш, привяжу и моцно до самого исхода, не мылячися з помыслом от лихоимства отодрати прикую. Если хочеш хитрецем, майстром, ремесником рукодѢлным быти и других вымыслом превозыйти, чим бы еси и от сусѢд прославитися и грошики собрати могл, пад, поклони ми ся, я тебе упремудрю, научу, наставлю и в досконалост твоего прагнення мысль твою приведу. Если хочеш похоти телеснои насытитися и господарем дому, древа и землѢ шмата назватися, пад, поклони ми ся, я твою волю исполню, я тобѢ жену приведу, хату дам, землю дарую, тое ярмо на твою шию повѢшу и твою мысль в бѢдѢ, неволи, скорби, мятежи, попечений, фрасунку и уставичном промыслѢ погребу, я тебе стражу, слугу, неволника и вязня женѢ учиню, я тобѢ всю мысль у жоны похотное студнѢ привяжу, толко поищи, попрагни и мнѢ ся поклони, вся сия аз тобѢ дам. ОтвѢт странника от лица всѢх прелщаемых от диявола: ВѢм, дияволе, як ты все тое реченное даси, если ся тобѢ поклоню, але пойду искати и в зерцалѢ учення Христова глядѢти, тая твоя данина на пожиток ли или на погибель вѢчную будет, на славу ли или на безчестие вѢчное ся превратит, на долго ли или на малый час ся в руках попѢстует, а потом з дароносцем посполу знагла погибает и ищезает. Даси ми, дияволе, быти папѢжем, кардиналом, арцибискупом и другим нѢкоторым духовного стану именоносцем, але што за пожиток с того дарованя, коли от тебе диявола, за гордость з небес на дол зверженного, тое достоинство прийму, а не от небесного Бога, которий велми заслужоным и от духа святого посвященным таковые преложенства стану духовного даровати звыкл, а не тым, которые, як псы встеклые, бѢгают, ищут, да стан духовный или имѢние оного угонят и поимают. Што за пожиток с того дару, коли я сам и от тебе, диявола, того попрагнул и поискал, а не Бог небесний мене на тое достоинство везвал и избрал. Што ж за пожиток с того духовенства, коли я горшей поганца злое и нечистое житие прохожу и в калу чревное похоти и сластолюбия ся валяю. Што ж за пожиток с того священства, коли я имени святости не знаю и с иновѢрци ровно мудростию, образом и житием ся знахожу. Што ж за пожиток с той власти пастыркой, коли я раб, неволник и вязень вѢчный грѢхови есть есми, за который в геену вѢчную отиду. Што ж за пожиток с той дочасной славици, коли я вѢчне посоромочон буду. Што ж ми за пожиток с той малое роскоши, коли я во вѢки в огни печи и скважитися буду. Што ж ми за пожиток с тых сел, и имѢней, и богатства великого, коли я наг и гол, без всего того, в пеклѢ седѢти буду. Прето вѢдай о том, дияволе, иж я поповского преложенства и стану от вышнего и до послѢднего стопня, от тебе дарованого, не прагну и тобѢ ся поклонити не хочу. Господу богу Бся единому поклоню и тому единому послужу. Иди за мною, сатана! Даси ми зась, дияволе, быти кролем, канцлером, гетманом, воеводою, старостою, каштеляном и другим нѢкоторым дикгнитаром и преложоным власти мирской твоего дияволского царства. Што ж за пожиток с того твоего дарованого поганского началства, коли я християнство страчу и живота вѢчного отпаду. Што ж ми за пожиток с того твоего мирского титулу, коли я царства небесного титул погублю. Што ж ми за пожиток с того голоса кролевства, канцлерства албо воеводства, коли я сыновство божие страчу, безсмертный титул. Што ж ми за пожиток с твоее малое славицы временное тытулку и гнилых и суетных уст хваления, коли я от божое вѢчное славы отврѢжен буду, титул помазанства божия погублю и похвалы ангельских уст отпаду. Я теды, дияволе, таковое власти и титулу от тебе не ищу, тобѢ ся поклонити не хочу. Господу Богу единому ся поклоню и тому единому послужу. Иди за мною, сатана! Даш ми зась, дияволе, купцем, лихоимцем, мытником и корчмаром быти, да тым лихоимством и упражнением розум свой погребу и ослѢплю. Што ж за пожиток с того твоего дару, коли свѢта истинны науки слова божия видѢти не могу и вкусити сладости его ся не сподоблю. Прето да знаеши, дияволе, як я от тебе того идолопоклонного титулу и забавы жития моего в нем не требу, тобѢ ся не поклоню. Господу Богу единому поклонюся и тому самому послужу. Иди за мною, сатана! Даш ми зась, дияволе, ремесльником хитрым и славным быти, да межи сосѢди славнѢйшим, годнѢйшим и честнѢйшим быти, грошики собѢ зберу, фолварки покуплю, домок приоздоблю. Што ж за пожиток с того всего твоего дарохитрства, коли я простоты Исусовы навыкнути не могу. Што ж ми за пожиток з славы и чести сусѢдское, коли я в лику пророк, патриарх, апостол, мученик и добре богу угодивших славитися не буду. Што ж ми за пожиток з многих фолварков и оздоб домку, коли я красных дворов горного Иерусалима не узрю и не во едином кутику в оном посидѢти не сподоблюся. Прето я от тебе, дияволе, тое майсторѢи славы и чести не требую, грошиков збирати, фолварков и домков куповати не хочу, тобѢ ся не поклоню. Господу Богу единому поклонюся и тому самому послужу. Иди за мною, сатана! Даш ми зась, дияволе, убогому и неславному человѢку, утѢху и похот телесную, жону, даш ми домок и землицю, даш ми смуток и бѢду, да свой розум в той забавѢ, фрасунку и стараня домового, земленного и женского погребу. Што ж за пожиток с тое утѢхи и похоти телесное, коли я утѢшителя духа святого витати во своем кгмаху сердечном николи ся не сподоблю. Што ж за пожиток с тое жоны, коли я Христа, жениха, своей ложници сердечной пришедшого упокоитися и спочинути, видѢти не могу. Што ж ми за пожиток с того домку, коли я в палацу небесного мѢста Иерусалима седѢти не буду. Што ж за пожиток с тое малое землици и кгрунтику, коли сторичное заплаты, реченное Христом в царствии небесном а оставление сих, не прийму и живота вѢчного наслѢдником и дѢдичем быти не могу. Прето да знаеш, дияволе, як я от тебе жоны, дому, земли дочасное не прагну, тобѢ поклонитися не хочу. Господу Богу, во троици славимому, поклонюся и тому единому послужу нынѢ, все время жития моего и во вѢки вѢков. Аминь. Иди за мною, сатана, изчезни и пропади сам и з царством своим прелестным! Аминь.
|